زهيريات في الحكمة والموعضة جميييييييييلة جدا(رجاء)

(في أسماء الله تعالى وصفاته العلا)

سبـــحان ربـي الــــذي يوصف بلا كيف

بذكرو انشراح الصدر ويطيب بيه الكيف

أتقن بخلقو الصنـــع مُعجز الكــم والكيف

مـــا ســـرح بيها النظر رد بن**ارو علي

كل يـــــــوم لُـــــوَّه شأن ربي الإله العلي

أسمائــو مــنــها الملك منها بكتابو العلي

منها البعلمو بقت ما تنعرف بالكيف

(في وصف الليالي والأيام)

من غير حادي يحـدي تمضي رواحلهن

ارجـــوع مـا يـرجعن دايــم رواح الهن

هيهات هــم يتعبن و فـتــرة رواح الهن؟!

عالدوم يجرن جري چنهن وراهن طرد

عنهن بعيد التعب لـــو لفه عدهن طـُرد

الحال منهن عجز والعيشه صارت طرد

والجاي ما ينعرف مو مثل راحلهن

(قلة الصديق والرفيق المخلص)

دنياك يا صاحبــي لا ترجى بـيـها اصحاب

صير لجنابك ربـــع واصطنع منها اصحاب

صوب المعالي النفس رافگ وللها اصحاب

واتـرك هـــذاك الـــذي بس بالچذب خاواك

غـــدار لــو لك ولــى سلّب وهـــــم خاواك

بيـــوم الكــريهه انهزم يـــوم السلِم خاواك

واخذ بمثال الحسن وامر الحسين اصحاب

الوكت مثجل علي و خير مـــا منـــو

مـــادام كلمن ردي يظهــر علي منــو

النفس عگب العبــر صارت عليمه انو

الموت أهـــون ولا تـــرجى قليل الحيا

فالعاش ذلـه وبؤس ياتعس ذيــچ الحيا

اللي حسبتو خـوي شو طلع مثل الحيا

هيهات فيمن تثق وتگول ما منو؟!

ليـــمال حـــظ الـــرجل منهـو اليواسيــه

و يـمسح اتلول الحـزن بترابـها يواسيه

يشوف المـوت بعيونـو وبـﮕبره يواسيه

ذاك البحملو مشى ومالـو صحيب انتخه

اشبيك ﮔلبك حجـر افـــزع تــراك انتخه

ﮔـُل للذي مــا مشى عالغانـمـات انتخه

يجيه ذاك اليوم ومحد يواسيه

(قصر الأمل)

دنياك يـا صاحبـي لا تبنى بـيـها الدور

دوّار بــيـها الفلك مــا تـلبـث الا تــدور

گبلك قضت هالخلگ لابـد يجيك الدور

فاصلح هوى النفس وانت بشبابك فتى

واستفتي گـلـبـك اذا أشكل عليـك الفِتى

كُثر المسائل بــدع تغوي وكثير الفـُتى

في طلعة الشمس ما أغنى عن بدور

(تضمينات)

الـﮕلب يشكي البعد شوف الولف بدّو

ياعين صب الدمع عـﮕب المشو بدّو

أحسب هـواهـــم عهد لكن أظن يبدو

إنهم نسونــه بـعد ﮔاطع فكرهم يرى

واسهامهم بالـﭽبد سايل يرحها يـره

من نكد هذا الوكت عالرجل أن يرى

عدواً له مامن صداقته بـُــدّ

من احسب أحبابي بـعدد للـكم رقـم أولي

يا روحي شنهو السبب لوّه بشرح أولي

هذا مـن احسب الأهل و حتى بـأمر أولي

دنياي هم اصبحوا زاد و شراب و هـوا

من اسباب ذاك الحسن للهم ﮔليبي هـوا

جرّب فؤادك وامش ما شئت من هالهوى

مـــا الحُــب إلا للحبـيـب الأولِ

(المبادره قبل المغادره)

صعب انــتـظار البخت تـــا يعتدل حظنا

ونـــسمع فهيـــم العــگــل البصبر حظنا

الدنـيــا صارت گبـر و بــالگبــر حظنه

تنسيك كل لحظتن مرت بعمرك فــــرح

تبچي لفراگك ربع وشامت بموتك فــرح

لو ردت تبغي العلا صوب المعالي فرح

وادخل ابعين الوكت وافگس لواحظنا

وختامها مسك..

إلهي يــامـنــزل الأمـطـار و الغيــث

غيــرك شــدعــي للكلفات و يـغـــيث

سـﮔم گلبــي الهــوى وادعــاه ﭼالغث

وحدت عـن الطريـق السوي و شتيت

نيسان سعدي انگضى وبالضيم شتيت

صفه عگلي عگب ذاك النــور شتيت

رحماك ربي تبت بلچي تغيث

» زهيريات في الحكمة والموعضة جميييييييييلة جدا(رجاء)